na mantraṃ nō yantraṃ tadapi cha na jānē stutimahō
na chāhvānaṃ dhyānaṃ tadapi cha na jānē stutikathāḥ ।
na jānē mudrāstē tadapi cha na jānē vilapanaṃ
paraṃ jānē mātastvadanusaraṇaṃ klēśaharaṇam ॥ 1 ॥
vidhērajñānēna draviṇavirahēṇālasatayā
vidhēyāśakyatvāttava charaṇayōryā chyutirabhūt ।
tadētat kṣantavyaṃ janani sakalōddhāriṇi śivē
kuputrō jāyēta kvachidapi kumātā na bhavati ॥ 2 ॥
pṛthivyāṃ putrāstē janani bahavaḥ santi saralāḥ
paraṃ tēṣāṃ madhyē viralataralō'haṃ tava sutaḥ ।
madīyō'yaṃ tyāgaḥ samuchitamidaṃ nō tava śivē
kuputrō jāyēta kvachidapi kumātā na bhavati ॥ 3 ॥
jaganmātarmātastava charaṇasēvā na rachitā
na vā dattaṃ dēvi draviṇamapi bhūyastava mayā ।
tathāpi tvaṃ snēhaṃ mayi nirupamaṃ yatprakuruṣē
kuputrō jāyēta kvachidapi kumātā na bhavati ॥ 4 ॥
parityaktā dēvānvividhavidhisēvākulatayā
mayā pañchāśītēradhikamapanītē tu vayasi ।
idānīṃ chēnmātastava yadi kṛpā nāpi bhavitā
nirālambō lambōdarajanani kaṃ yāmi śaraṇam ॥ 5 ॥
śvapākō jalpākō bhavati madhupākōpamagirā
nirātaṅkō raṅkō viharati chiraṃ kōṭikanakaiḥ ।
tavāparṇē karṇē viśati manuvarṇē phalamidaṃ
janaḥ kō jānītē janani japanīyaṃ japavidhau ॥ 6 ॥
chitābhasmālēpō garaḻamaśanaṃ dikpaṭadharō
jaṭādhārī kaṇṭhē bhujagapatihārī paśupatiḥ ।
kapālī bhūtēśō bhajati jagadīśaikapadavīṃ
bhavānī tvatpāṇigrahaṇaparipāṭī phalamidam ॥ 7 ॥
na mōkṣasyākāṅkṣā na cha vibhavavāñChāpi cha na mē
na vijñānāpēkṣā śaśimukhi sukhēchChāpi na punaḥ ।
atastvāṃ saṃyāchē janani jananaṃ yātu mama vai
mṛḍānī rudrāṇī śiva śiva bhavānīti japataḥ ॥ 8 ॥
nārādhitāsi vidhinā vividhōpachāraiḥ
kiṃ rūkṣachintanaparairna kṛtaṃ vachōbhiḥ ।
śyāmē tvamēva yadi kiñchana mayyanāthē
dhatsē kṛpāmuchitamamba paraṃ tavaiva ॥ 9 ॥
āpatsu magnaḥ smaraṇaṃ tvadīyaṃ
karōmi durgē karuṇārṇavē śivē ।
naitachChaṭhatvaṃ mama bhāvayēthāḥ
kṣudhātṛṣārtāḥ jananīṃ smaranti ॥ 10 ॥
jagadamba vichitramatra kiṃ
paripūrṇā karuṇāsti chēnmayi ।
aparādhaparamparāvṛtaṃ
na hi mātā samupēkṣatē sutam ॥ 11 ॥
matsamaḥ pātakī nāsti pāpaghnī tvatsamā na hi ।
ēvaṃ jñātvā mahādēvī yathā yōgyaṃ tathā kuru ॥ 12 ॥
iti śrīmachChaṅkarāchārya virachitaṃ dēvyaparādhakṣamāpaṇa stōtram ।
January 28, 2026 - BY Admin